ନୂଆଦିଲ୍ଲୀ, ୩/୪: ଭାରତୀୟ ପାଣିପାଗ ବିଭାଗ (ଆଇଏମ୍ଡି )ର ସାଟେଲାଇଟ୍ ଚିତ୍ରରେ ଏକ ବିରଳ ପାଣିପାଗ ଘଟଣା ଦେଖାଯାଇଛି। ପ୍ରାୟ ୧୦୦୦ କିଲୋମିଟର ଲମ୍ବର ଏକ ବିଶାଳ ମେଘମାଳା ଭାରତ ଓ ପାକିସ୍ତାନର ଏକ ବିସ୍ତୃତ ଅଞ୍ଚଳକୁ ଆବରଣ କରିଛି। ଏହି ପରିବର୍ତ୍ତନ ସାଧାରଣ ବର୍ଷାର ଫଳ ନୁହେଁ; ବରଂ ଭୂମଧ୍ୟସାଗରୀୟ ଅଞ୍ଚଳରୁ ପୂର୍ବମୁଖୀ ଗତି କରୁଥିବା ଶକ୍ତିଶାଳୀ ପଶ୍ଚିମା ଝଡ଼ର ପରିଣାମ। ଏହା ବାୟୁମଣ୍ଡଳରେ ଅଧିକ ଜଳୀୟ ବାଷ୍ପ ଓ ଅସ୍ଥିରତା ସୃଷ୍ଟି କରି ଆଗାମୀ କିଛି ଦିନ ପାଇଁ ଦକ୍ଷିଣ ଏସିଆର ପାଣିପାଗକୁ ପ୍ରଭାବିତ କରିବ। ଏହି ମେଘମାଳା ବର୍ତ୍ତମାନ ଜମ୍ମୁ-କାଶ୍ମୀର, ହିମାଚଳ ପ୍ରଦେଶ, ପଞ୍ଜାବ, ହରିୟାଣା, ରାଜସ୍ଥାନ ଓ ପାକିସ୍ତାନ ସୀମା ଅଞ୍ଚଳରେ ସ୍ଥିର ରହିଛି। ପାଣିପାଗ ବିଜ୍ଞାନୀମାନେ ଚେତାବନୀ ଦେଇଛନ୍ତି ଯେ, ଏହାର ପ୍ରଭାବରେ ଉତ୍ତର ଓ ଉତ୍ତର-ପଶ୍ଚିମ ଭାରତରେ ପ୍ରବଳ ବର୍ଷା, ବଜ୍ରପାତ ଓ ବେଗବାନ ପବନ ବହିପାରେ। ବିଶେଷକରି ସମତଳ ଅଞ୍ଚଳ ଓ ହିମାଳୟ ପାଦଦେଶରେ କୁଆପଥର ବୃଷ୍ଟି, ଘନଘନ ବଜ୍ରପାତ ସହିତ ହଠାତ୍ ତାପମାତ୍ରା ହ୍ରାସ ପାଇବାର ସମ୍ଭାବନା ରହିଛି। ଏହା ଗ୍ରୀଷ୍ମ ଲହରିରୁ ସାମୟିକ ରାହାତ ଦେବା ସତ୍ୱେ, ପ୍ରାକୃତିକ ବିପର୍ଯ୍ୟୟର ଆଶଙ୍କାକୁ ମଧ୍ୟ ବଢ଼ାଇଛି। କୃଷି କ୍ଷେତ୍ର ପାଇଁ ଏହା ଏକ ଚିନ୍ତାଜନକ ଖବର। ଚାଷ ଜମିରେ ଥିବା ପାକଳ ଶସ୍ୟ ଉପରେ ପ୍ରବଳ ବର୍ଷା ଓ କୁଆପଥର ମାଡ଼ ହେବାରୁ ବ୍ୟାପକ କ୍ଷତି ହେବାର ଭୟ ରହିଛି। ଆଇଏମ୍ଡି ଚାଷୀମାନଙ୍କୁ ସତର୍କ ରହିବାକୁ ପରାମର୍ଶ ଦେଇଥିବା ବେଳେ, ପ୍ରଶାସନ ପକ୍ଷରୁ ସ୍ଥାନୀୟ ବାସିନ୍ଦାଙ୍କୁ ଆଗାମୀ ୪୮ରୁ ୭୨ ଘଣ୍ଟା ପର୍ଯ୍ୟନ୍ତ ସଚେତନ ରହିବାକୁ ନିର୍ଦ୍ଦେଶ ଦିଆଯାଇଛି।
୧୦୦୦ କିମିର ବିଶାଳ ମେଘମାଳା: ଉତ୍ତର ଭାରତରେ ଭୟାବହ ପାଣିପାଗ ପରିବର୍ତ୍ତନର ସଙ୍କେତ
