କଟକ, ୨/୩ (ଇମିସ): ପଶ୍ଚିମବଙ୍ଗରୁ ପିଜି ମାଧ୍ୟମରେ କଟକ ଶିଶୁଭବନକୁ ଅଣାଯାଇଥିବା ଜଣେ ଶିଶୁକନ୍ୟାର ଶ୍ୱାସନଳୀରେ ଏକ ମାସ ଧରି ଅଟକିଥିବା ଚକୋଲେଟ୍ ଜରି ଡାକ୍ତରମାନେ ସଫଳତାର ସହ ବାହାର କରିଛନ୍ତି। ପଶ୍ଚିମବଙ୍ଗରେ ଡାକ୍ତରୀ ଦଳ ଏହାକୁ ବାହାର କରିବାରେ ସଫଳ ହୋଇପାରିନଥିଲେ। କିନ୍ତୁ କଟକରେ ଆଣିବା ପରେ ମାତ୍ର ଏକ ଘଣ୍ଟାରେ ବ୍ରୋଙ୍କୋସ୍କୋପି ପ୍ରକ୍ରିୟାରେ, କୌଣସି ବଡ଼ ଅସ୍ତ୍ରୋପଚାର ବିନା, ଏହାକୁ ବାହାର କରାଯାଇଥିଲା।
ପଶ୍ଚିମବଙ୍ଗର ମେଦିନାପୁର ଜିଲ୍ଲାର ଭଗବାନପୁର ଅଞ୍ଚଳର ମୁଜାହିଦ ମଲ୍ଲିକଙ୍କ ୩ ବର୍ଷ ୪ ମାସର କନ୍ୟା ଗତ ଫେବୃଆରୀ ୨ ତାରିଖରେ ଖାଇବା ସମୟରେ ହଠାତ୍ କାଶିବା ଆରମ୍ଭ କରିଥିଲା। ତଣ୍ଟିରେ କିଛି ଅଟକିଥିବା ସନ୍ଦେହରେ ମା’ ଆଙ୍ଗୁଠି ପୁରାଇବାରୁ ଶିଶୁଟି ଅଧିକ କାଶିଥିଲା ଓ ରକ୍ତସ୍ରାବ ହୋଇଥିଲା। ପରେ ତାକୁ ନିକଟସ୍ଥ ହସ୍ପିଟାଲକୁ ନିଆଯାଇଥିଲା। ଏକ୍ସ-ରେ ପରୀକ୍ଷା ପରେ ଚିକିତ୍ସା ଆରମ୍ଭ ହେଲେ ମଧ୍ୟ ଲକ୍ଷଣରେ ସୁଧାର ଆସିନଥିଲା। ନେବୁଲାଇଜର ଚିକିତ୍ସା ଦିଆଯାଇଥିଲେ ମଧ୍ୟ କୌଣସି ଫଳ ମିଳିନଥିଲା।
ପରେ ତାକୁ କୋଲକାତାକୁ ସ୍ଥାନାନ୍ତର କରାଯାଇଥିଲା, କିନ୍ତୁ ସେଠାରେ ମଧ୍ୟ ବ୍ରୋଙ୍କୋସ୍କୋପି ମାଧ୍ୟମରେ ଏହାକୁ ବାହାର କରିବା ସମ୍ଭବ ହୋଇନଥିଲା। ଶେଷରେ ଫେବୃଆରୀ ୨୬ ତାରିଖରେ କଟକ ଶିଶୁଭବନକୁ ଅଣାଯାଇଥିଲା। ୨୭ ତାରିଖରେ ବ୍ରୋଙ୍କୋସ୍କୋପି କରାଯାଇ ଶ୍ୱାସନଳୀରୁ ଚକୋଲେଟ୍ କଣିକା ଚିହ୍ନଟ ହୋଇଥିଲା, ଯାହା ଭୋକାଲ କର୍ଡ ନିକଟରେ ଅଟକି ରହିଥିଲା। ଡାକ୍ତରୀ ଦଳ ସଫଳତାର ସହ ଏହାକୁ ବାହାର କରିଥିଲେ।
ସମୟରେ ଏହାକୁ ବାହାର କରାଯାଇନଥିଲେ, ଶିଶୁଟିର ଜୀବନ ଜୋଖିମରେ ପଡ଼ିପାରୁଥାନ୍ତା ବୋଲି ଡାକ୍ତରମାନେ କହିଛନ୍ତି। ଏହି ଚିକିତ୍ସାରେ ପେଡିଆଟ୍ରିକ୍ ଆଇସିୟୁ ଇନ୍ଚାର୍ଜ ଓ ପେଡିଆଟ୍ରିକ୍ ମେଡିସିନ୍ ବିଭାଗର ପ୍ରଫେସର ଡା. ବିଜୟ କୁମାର ମେହେର, ଆସିଷ୍ଟାଣ୍ଟ ପ୍ରଫେସର ଡା. ମୃତ୍ୟୁଞ୍ଜୟ ରାଉତରାୟଙ୍କ ସହ ଅନ୍ୟାନ୍ୟ ଡାକ୍ତରମାନେ ସାମିଲ ହୋଇଥିଲେ।
ଶିଶୁକନ୍ୟା ସମ୍ପୂର୍ଣ୍ଣ ସୁସ୍ଥ ହେବା ପରେ ତାକୁ ହସ୍ପିଟାଲରୁ ଛଡ଼ାଯାଇଛି। ବ୍ରୋଙ୍କୋସ୍କୋପି ପ୍ରକ୍ରିୟାରେ ଏପର୍ଯ୍ୟନ୍ତ ଶିଶୁଭବନରେ ୪୨ ଜଣ ଶିଶୁଙ୍କ ଶ୍ୱାସନଳୀରୁ ବିଭିନ୍ନ ପ୍ରକାର ଅଟକିଥିବା ବସ୍ତୁ ସଫଳତାର ସହ ବାହାର କରାଯାଇଛି।
