ଗଲ୍ଫ ସହର ଏବେ ରଣକ୍ଷେତ୍ର
ଦୁବାଇ, ୫/୪: ମଧ୍ୟପ୍ରାଚ୍ୟରେ ଚାଲୁଥିବା ସଂଘର୍ଷ ଆଜି ୩୭ତମ ଦିନରେ ପ୍ରବେଶ କରି ଉପସାଗରୀୟ ଦେଶଗୁଡ଼ିକ ପାଇଁ ଅତ୍ୟନ୍ତ ଭୟାବହ ରୂପ ନେଇଛି। ହର୍ମୁଜ୍ ପ୍ରଣାଳୀକୁ ପୁନଃ ଖୋଲିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ଦେଇଥିବା ୪୮ ଘଣ୍ଟିଆ ଅଲ୍ଟିମେଟମ୍କୁ ଇରାନ ସ୍ପଷ୍ଟଭାବେ ପ୍ରତ୍ୟାଖ୍ୟାନ କରିଛି।
ଇରାନର ବରିଷ୍ଠ ସେନା ଅଧିକାରୀ ଅଲି ଅବ୍ଦୁଲ୍ଲାହି ଅଲିଆବାଦି ଟ୍ରମ୍ପଙ୍କ ଧମକକୁ “ଅସହାୟ ଓ ଉତ୍ତେଜନାପୂର୍ଣ୍ଣ” ବୋଲି କହି ପରିହାସ କରିଛନ୍ତି। ସେ ସତର୍କ କରିଛନ୍ତି ଯେ ଯଦି ଇରାନ ଉପରେ ଆକ୍ରମଣ ଜାରି ରହେ, ତେବେ ଆମେରିକୀୟ ସେନା ପାଇଁ “ନରକର ଦ୍ୱାର” ଖୋଲିଯିବ।
ଏହି ପରିସ୍ଥିତିରେ ଗଲ୍ଫ ଅଞ୍ଚଳର ପ୍ରମୁଖ ସହରଗୁଡ଼ିକ ରଣକ୍ଷେତ୍ରରେ ପରିଣତ ହୋଇଛି। ଦୁବାଇର ଆର୍ଥିକ କେନ୍ଦ୍ରରେ ବିସ୍ଫୋରଣ ଘଟିଥିବାବେଳେ, କତାରର ଅଲ୍ ଉଦେଇଦ୍ ବାୟୁସେନା ଘାଟି ଉପରେ ମିସାଇଲ୍ ଆକ୍ରମଣ ହୋଇଛି। ବାହାରିନରେ ଡ୍ରୋନ୍ ଆକ୍ରମଣ ଯୋଗୁଁ ଇନ୍ଧନ ସଂଗ୍ରହ କେନ୍ଦ୍ରଗୁଡ଼ିକରେ ଭୟାବହ ଅଗ୍ନିକାଣ୍ଡ ଘଟିଛି।
ସେହିପରି ଆବୁ ଧାବିର ବୋରୂଜ୍ ପେଟ୍ରୋକେମିକାଲ୍ କାରଖାନାରେ ଆକାଶରୁ ପଡ଼ିଥିବା ଭଗ୍ନାବଶେଷରୁ ନିଆଁ ଲାଗି କାର୍ଯ୍ୟ ବନ୍ଦ ହୋଇଛି। ଇରାକ ଓ ୟେମେନର ଇରାନ ସମର୍ଥିତ ମିଲିସିଆମାନେ ଶତାଧିକ ଡ୍ରୋନ୍ ଆକ୍ରମଣ କରୁଛନ୍ତି।
ଅନ୍ୟପକ୍ଷରେ ଲେବାନନ ସୀମାରେ ଉତ୍ତେଜନା ଚୂଡ଼ାନ୍ତରେ ପହଞ୍ଚିଛି। ବେରୁତର ଦକ୍ଷିଣ ଅଞ୍ଚଳରେ ଇସ୍ରାଏଲ ବାୟୁସେନା ଭୟଙ୍କର ଆକ୍ରମଣ କରିଛି, ଯେଉଁଠାରେ ହେଜବୁଲ୍ଲା ସହ ସମ୍ପର୍କିତ କେନ୍ଦ୍ର ଥିବା ଦାବି କରାଯାଇଛି। ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ସହର ଉପରେ କଳା ଧୂଆଁ ଛାଇଯାଇଛି ଏବଂ ଲୋକେ ପଳାୟନ କରୁଛନ୍ତି।
ସେହିପରି, ଦକ୍ଷିଣ ଲେବାନନରେ ଇସ୍ରାଏଲ ପ୍ରତିରକ୍ଷା ବାହିନୀ ଗତ ୨୪ ଘଣ୍ଟାରେ ୯୦ରୁ ଅଧିକ ଆତଙ୍କବାଦୀଙ୍କୁ ନିପାତ କରିଥିବା ଦାବି କରିଛି।
ଏହି ଅବସ୍ଥାରେ ବୈଶ୍ୱିକ ସୁରକ୍ଷା ପ୍ରତି ଗଭୀର ଆଶଙ୍କା ସୃଷ୍ଟି ହୋଇଛି। ଆରବ ସାଗରରେ ଆମେରିକା ଯୁଦ୍ଧପୋତ ଓ ବି-୨ ଷ୍ଟିଲ୍ଥ ବୋମାବର୍ଷୀ ବିମାନ ମୁତୟନ କରାଯାଇଥିବା ବେଳେ, ଇରାନ ନିଜର ମିସାଇଲ୍ ପ୍ରଣାଳୀକୁ ପର୍ବତୀୟ ଗୁପ୍ତ ସୁଡ଼ଙ୍ଗରେ ସଜାଗ ରଖିଛି।
